Luke 24

A Fatatoi Fa'uliaan Na Yesus

Mt 28:1-8; Mk 16:1-8; Jn 20:1-8

1Taasaxa la yaan mata ina ‘wiik’, la paanen lolof, a lutefin ri falet xe la liing ina mamaat pana maana mo lalas aava ri fo faigotane. 2Ri xalum a faat molava a pife ti votan fulan a liing ina mamaat. 3Ri laak lana taasaxa ri pife tingin a mamaat i Memai Yesus. 4Layaan ri taxa lalamon pana mo aanabe', fataapus paaliu, a rovaat tomexaan lana marapi aava rarapak malaan sena yaamit re maa tigina la tana lutefin aave. 5Nari, ri mataut faagut e ri bukaak xe lapia, taasaxa a rovaat aave re xuus nari, “Xenaso mi taxa seng a saxa aava fo to fa'ulaa nabe', la palou ina mu mamaat? 6Nane pife waan iau, i taxa to! Lamon fa'uli a ferawaian sina. Layaan i taxa waan xuvul pami pe Galili nane xuus nami o 7a Natuna Mataa, ri taa tavai a mu rabuna saat pana e ri taa niil fataxutane e lamina, la fatalatulaana yaan i taa to fa'ulaa.” 8E mui ri lamon fa'uli a ferawaian sina.

9Layaan ri ulaa ti la liing ina mamaat ri xuus fatexaas a mu yaamut sangafilu saxa pana saxa xuvul pana xasanofuna. 10Na Maria Mekdala, na Joaana e na Maria na nina Jems, rutul xuvul pana xasano lutefin, ri xuus fatexaas a mu yaamut pana maana mo aanabe'. 11Nari, ri lamon o a ferawaian sina lutefin a ferawaian palau mon. 12Taasaxa na Pita xo a tamasiak e fala xe la liing ina mamaat. Nane xewai e xalum a marapi ina mamaat mon taxa waan e nane ulaa e lalamon pana so ta mo fo savat.

A Rovaat Re Sangas Xe Imeas

13Lana yaan aanabe' a rovaat aava re fuuna usi na Yesus, re taxa sangas sivi xe la bina Imeas, pife lasuun se Jerusalem, faasilak 12 kilomita mon, 14e re taxa ferawai pana maana mo aava fo savat. 15La fena sangasan sire na Yesus fatak xa maa savat e sangas xuvul pare. 16A saxa mo tivotan a masaman sire e re ngalngolane.

17Nane fin nare, “A so ta mo me taxa paa fexuusane?”

Re tigina kasam, a nonau ire a nanosaat. 18A saxa sire, isina na Kiapas, a fine, “Nano, no taxa waan pe Jerusalem e no pife texaas sena maana mo aava fo savat iau lana mu yaan aanabe', bo?”

19E na Yesus a fiai, “A so ta mo?”

Nare, re suie, “A maana mo se Yesus ti Nasaret. Nane ve a mataa ina kuus fatuxai aava toxan a gutan lana ferawaian e vilaana sina la matana Piran e mu rabuna xapiak. 20E mu paamua priis e mu matalava sitaara ri yot lisane xe sina paamua ti Rom xena punuxaana e nari, ri niil fataxutane. 21Taasaxa maam fo lamon o nane a saxa aava i taa maraan fa'uli na Israel. E naboxo a yaan talatul fo falet xo. 22E vaxa, saxano lutefin simaam ri fa'ipul nemaam. La paanen lolof ri falet xe la liing ina mamaat, 23taasaxa ri pife xalum a vipin ina. Ri maa xuus nemaam o ri fo xalum a ro angelo aava kuus o nane fo to fa'ulaa. 24Saxanofuna imaam, ri falet xe la liing ina mamaat e ri tingin a maana mo malaan sena lutefin ri fo kuusane taasaxa ri pife xalum nane.”

25E na Yesus a ferawai xe sire, “A lamonan sime a tavanat, me pife matavas sena maana mo a mu rabuna ina kuus fatuxai ti kavai ri fo kuusane. Me pife masam lunaiane, bo? 26A mu rabuna ina kuus fatuxai ri fo kuus o a Mataa Failai i taa maasak pana maana mo aanabe' e mui i taa laak lana malang molava sina, tuuna?” 27E nane tangpat pana xakalayan si Moses e maana rabuna ina kuus fatuxai xapiak e a xuus famatavas nare pana maana mu palagasai aava waan lana Ferawaian sina Piran sena.

28Rutul fe savat faasilak la bina sire e na Yesus a sangas ludalet e bilai malaan sena i taxa falet xe lasuun. 29Taasaxa re bukane o i taa waan xuvul pare e re kuus, “Faasilak a ngaas i rul e a bina taxa rao i suk, no waan xuvul pamaame xalak.” E voxo nane fe laak la lifu sire xena waan xuvul pare.

30Layaan nane taxa nai xo xuvul pare la ivin, nane siak a bret e fenung pana e viaxe e a tavai nare pana. 31E mui a matare talakas e re kaalum pana masaman e re taraxalie. Taasaxa nane malit palau la matare. 32E re fefiaian nare, “A tuuna, a malaan sena fata taxa raam la xunus itaare layaan nane taxa kuusan famatavas a ferawaian sina Piran xe sitaare la fena sangasmaanan sitaare.”

33Re tamasiak fataapus e re ulaa xe Jerusalem. Pave re tingin a mu yaamut sangafilu saxa pana saxa e saxanofuna ri taxa faxuvul 34e nari, ri taxa kuus, “A tuuna, a Memai fo to fa'ulaa. Nane fo savat si Saimon.” 35E mui a rovaat aave re xuus nari pana so ta mo fo savat la fena sangasan sire e malaafaa re taraxali na Yesus layaan nane viak a bret.

Na Yesus A Savat Sina Mu Rabuna Sina

Mt 28:16-20; Mk 16:14-18; Jn 20:19-23

36Layaan ri taxa ferawai pana maana mo aanabe' na Yesus fatak xa maa tigina la palou iri e a kuus, “A luaian xe xulumi.”

37Nari, ri ipul e ri mataut senaso ri lamon o a rongan. 38E nane xuus nari, “Xenaso mi ipul e xenaso sait mi taxa lamon xolai? 39Xalum a maak e a kaak. Nenia move. Tao nenia e mi taa texaas, a rongan piau ta meska e tun malaan sega.”

40Nane kuus malaan e mui nane faxalit nari pana mana e kana. 41Ri pife fexaxaas sena lamon fatak senaso ri faamamaas fasaat paaliu e nane fiai, “Mi toxan ta fanganan ve taxa waan?” 42Ri tavaie pana nedin aava ri fo suluxe 43e nane ngane la matari.

44E mui nane xuus nari, “Ne fo xuus fatexaas nami pana maana mo aanabe' layaan ne taxa waan xuvul pami lunai; a maana mo aava ri xaleie lana vuputkai si Moses sega e lana xakalayan sina mu rabuna ina kuus fatuxai e lana mu yanganan sega, ri fo savat la matavas.”

45E mui nane ferawai fatalakas a lamonan siri talo ri taa masam faroxo pana Ferawaian sina Piran. 46Nane xuus nari, “Ri fo kala malaan: A Mataa Failai i taa maasak e taa to fa'ulaa ti la maatan la fatalatulaana yaan, 47e lana isina, a rabuna ri taa kuusan a lagasai o a Piran i taa lamon tapin a vilaana saat tamo ri taa puk tapin nari xa xasena vilaana saat siri e ri usi na Yesus. A lagasai aanabe' ri taa fapiti a mu rabuna xapiak pana e ri taa tangpat nabe' Jerusalem. 48Nami, mi fo xalum a maana mo aanabe'. 49E ne taa feng a so ta mo na Tamaang fo kuus fanai pana xe simi. Taasaxa mi taa waan la bina fefexaxaas a gutan ti laa'ui i taa sivimaan xulumi.”

A Xel Falaxaan Na Yesus

50Layaan nane paamuian nari xe pe Betani, nane talangai xe laa'ui e kuus fararoxo xuluri. 51Layaan i taxa ferawai malaan nane ta'ulan nari e a xel falaxan xe laa'ui la xunavata. 52E ri nanguse e mui ri fe ulaa xe Jerusalem pana faamamaasan molava paaliu marasaxa. 53E ri waan vulai lana lifu lotu e ri fuuna kuus faasiroxo vulai xe sina Piran.